Sözleri
Benem ol ‘aşk bahrîsi denizler hayrân bana
Deryâ benim katremdir zerreler ‘ummân bana
Kâf dağı zerrem değil ay u güneş bana kul
Aslım Hakk’dır şek değil mürşiddir Kur`ân bana
Çün dosta gider yolum mülk-i ezeldir ilim
Hakk’dan söyler bu dilim ne kul ne sultân bana
Yoğ idi bu bârigâh vâr idi ol pâdişâh
Âh bu ‘aşk elinden âh derd oldu dermân bana
Âdem yaradılmadan cân kalıba girmeden
Şeytân la’net olmadan ‘arş idi sayvân bana
Diledi göre yüzün işide kendi sözün
Nazar kıldı bir kezin anda cân virdi bana
Yaradıldı Mustafâ yüzü nûr gönlü safâ
Ol kıldı Hakk’a vefâ andandır ihsân bana
Doğdu ol dîn metâsı andan oldu kamusu
Âdem Halîl ü Mûsâ hüccet ü bürhân bana
‘Âşık dilin bilmeyen yâ delidir yâ dehrî
Ben kuş dilin bilirem söyler Süleymân bana
Yûnus Emrem bu yolda eksikliğin bildirir
Mest oluban çağırur dervîşlik bühtân bana