Sözleri
Hâdise-i devr-i zemân
Besdir gönül endîşesi
Fitneleri âhir zemân
Besdir gönül endîşesi
Şer’-i şerîfden kaçdılar
Bid’at yoluna düşdüler
Kānûn u nizâm açdılar
Besdir gönül endîşesi
Âr u nâmûs gitdi gider
İlm ile hilmi kim n’ider
Günden güne yevme’l-beter
Besdir gönül endîşesi
Doldu cihâna şûr u şer
Kâr u zarar bilmez beşer
Ehl-i fesâd dizden eşer
Besdir gönül endîşesi
Günden güne işler azar
Ederler rişveti bâzâr
Kimler okur kimler yazar
Besdir gönül endîşesi
Ekser ulemâ-yı zemân
Terk etdi meslekin hemân
Dünyâ içün oldu revân
Besdir gönül endîşesi
Hakîmâne kin dutdular
Ser-fürû edüp gitdiler
Hubb-i riyâset etdiler
Besdir gönül endîşesi
Mürşid mürîdin kesreti
Gitdi tarîkın rağbeti
Dünyaya vermiş himmeti
Besdir gönül endîşesi
Kendinde cehli bâkîdir
İlm-i tasavvuf okudur
İpliği yok bez dokudur
Besdir gönül endîşesi
Yüzbin koyun bir kurd içün
Yüzbin kuzu bir kürd içün
Bir habbe yok bir merd içün
Besdir gönül endîşesi
Cümle fakîri ezdiler
Cild-i fakîri üzdüler
Biryânı şişe dizdiler
Besdir gönül endîşesi
Gitdi nisâlardan hayâ
Kalmadı dillerde zıyâ
Âbidlerin işi riyâ
Besdir gönül endîşesi
İmdi bu ümmet der-cihân
Gerek diye yâ Müsteân
Sen ver bize tekmîl îmân
Besdir gönül endîşesi
LUTFÎ sığın Allah’a sen
Dâimâ ol li’llâhe sen
Dil bağla gel Allah’a sen
Besdir gönül endîşesi