Sözleri
Bir dîde-i fettân dilber-i dildâr
Bir bakışla aldı ihtiyârımı
Taht-ı melâhatde kurulmuş hünkâr
Târ u mâr eyledi âr u vârımı
Gülistân-ı kudret güneş cemâli
Mecme-i mehâsin kamer misâli
Dilberler içinde yoktur emsâli
Mecnûn-veş mahvetdi iʻtibârımı
Bir meşrebi nazlı zarf-ı zarâfet
Bir mahbûb-i mümtâz şân u şerâfet
Gözler görmemişdir hûrî kıyafet
Görünce götürdü iktidarımı
Emsâli bulunmaz bir mîr-i kallâş
Aşık ölür deyu eyler mi telâş
Ham-gerden des-beste gözümde kan yaş
Gece gündüz alur intizârımı
LUTFÎ’ye lutfeyle nâzlı civânım
Sana kurbân olsun rûh-i revânım
Senden gayri var mı dârü’l-emânım
Hâk-i pâyan hasr et iftihârımı