Sözleri
Bir maraz-ı mühlik sardi cihânı
Bu derdin âşikâr dermânı yokdur
Vîrân oldu halkın dâru’l-emânı
Zâhirde ta’mire imkânı yokdur
Ebnâ-yı Âdem’in dâr-ı dünyâda
Kalmadı râhatı mülk-i fenâda
Herkes helâkine olmuş âmâde
Bugün selâmetin nişânı yokdur
Nûr-i Muhammedî gözlerden gitdi
Kalblerden tevhîdin esrârı yitdi
Hidâyet diyânet seâdet bitdi
Ekser-i İslâmın irfânı yokdur
Îmân İslâm kaldı binde bir ferdde
O da gark olmuşdur bu bahr-i derdde
Dürr-i himmet vardır bazı bir merdde
Anın da elinde meydânı yokdur
Rûy-i zemîn rû-siyâhdır âşikâr
Fısk u fesâd ile dolmuş bî-şümâr
İ’tibâr bulmuşdur rezîl cefâkâr
Şeytân olan nâsın şeytânı yokdur
Bin üçyüz otuzbir târîh-i hicret
Kalmadı İslâm’da adâlet gayret
Tard ü teb’id oldu erbâb-ı himmet
Hele fütûhâtın derbânı yokdur
Fakîr hakîr sıbyan pây-mâl oldu
Zulm ü hakaretle âsumân doldu
Gülistân-ı dînin gülleri soldu
Tarîk-ı Kur’ân’ın kurbânı yokdur
LUTFİYÂ der yandım yakıldım n’idem
Bu bahr-i la’netde nereye gidem
Îmân gider küfür gelir dem-be-dem
Mü’mine ölmenin zıyânı yokdur