Sözleri
Deryâ-yı keremden bir katre yâ Rab
İhsân buyur derdimize dermândır
Mihr-i merhametten bir zerre yâ Rab
Kerem buyur afvimize fermândır
Mihr-i kereminde güneş bir zerre
Bu kâinât olsa nice bin kerre
Kudretin bahrinde olmaz bir katre
Nukûşât-ı eşyâ zarf-ı irfândır
Ârifâne nazar etse bir insân
Bu mahlûk mir’ât-ı kudret-i Rahmân
Gözünde var ise envâr-ı irfân
Mûcid-i mevcûda ayn-i bürhândır.
Âlemi halkeden Hallâk-ı âlem
Mükerrem halk olmuş ebnâ-yı Âdem
Dest-i risâletde Muhammed hâtem
Tevhîd etmek bir Allah’ı îmândır
Hâtem-ül- Enbiyâ Ahmed-i muhtâr
Habîb-i Kibriyâ Sultân-ı Ebrâr
Gönderdi zâtına Kur’ân’ı Gaffâr
Ashâb-ı tevhîde dâr’ül-emândır
Bu MUHAMMED LUTFÎ dergâhı gözler
Bu dergâha karşu yerdedir yüzler
Aman Allah aman dillerde sözler
Erhamü’r-râhimîn zât-ı Rahmân’dır