Sözleri
Mâşâa’llah ayn-i Kur’ân’dır habîb-i Kibriyâ
Bârekâ’llah rahm-i Rahmân dır habîb-i Kibriyâ
Rahmeten li’l-âlemin halk etdi bil Mevlâ anı
Teâlâ’llah kenz-i irfândır habîb-i Kibriyâ
Nûr-i Hak’dır feyz-i Hak’dır lutf-i Hak’dır âleme
Hak budur ki lübb-i îmândır habîb-i Kibriyâ
Onsekiz bin âlemin îcâdına oldur sebeb
Emr-i Levlâk ile sultândır habîb-i Kibriyâ
Hak anı sevdi ezel halk etdi muhtâr eyledi
Vasf olunmaz sırr-ı Yezdân’dır habîb-i Kibriyâ
Şâh-ı evreng-i risâlet şems-i burc-i enbiyâ
Evliyâya mihr-i rahşândır habîb-i Kibriyâ
Şems-i bezm-i vahdet oldu nûr cemâlin ey güzel
Akl erişmez âlî zî-şândır habîb-i Kibriyâ
“Küntü kenz” esrârını âlemlere ifşâ kılan
Zâhir u bâtında bürhândır habîb-i Kibriyâ
Enbiyânin serveridir evliyânın rehberi
Hak resûlü ins ile cândır habîb-i Kibriyâ
Âlem-i mülk-i melekût cümle halk-ı kâinât:
Bildiler ki emr ü fermândır habîbi Kibriyâ
Oldur Ahmed ü Muhammed Mustafâ Mahmûd odur
Der-ezel muhtâr-i Sübhân’ dır habîb-i Kibriyâ
LUTFÎ’ye lutfet eyâ sultân-ı kevneyn hak Resûl
Bilmişem ben mahz-ı ihsândır habîb-i Kibriyâ