Sözleri
Kıyâmet kurbidir mutlak bu dînin gül-gülistânı
Solar elbet budur hikmet bozulur bâğ u bostânı
Bu tevhîd gülleri bâğ-ı hidâyetden düşer bir bir
Çekildi evliyâu’llah Kitâbu’llah nûristânı
Mukadder eylemiş Allah Teâlâ şânühü ekber
Bu dünyaya gelen gider bekāya yokdur imkânı
Bu âlem fân olur rûz-i kıyâmet âkıbet vardır
Seher vaktinde sûzişle okur bülbül bu destânı
Sükût etdi bu eflâk-i hidâyetden yine bir necm
Erişdi kûy-i cânâne muvahhid mîr-i meydânı
Bütün ömrünü sarf etdi tarîk-ı hazret-i Hakk’da
Halîlu’llah’e hem-nâmdır mukaddes rûh-i nûrânî
Mübarek ismi İbrâhim Hacı Baba ile şöhret
Şi’âr olmuş idi ol zât vücûdu himmet ummânı
Cenâb-ı zü’l-Celâl Allah kerem bahrine gark ede
Kerem-kâni Kerîmü’ş-şân eder elbette ihsânı
Muhammed meşrebi ekser olurdu mûsevî bâzan
Dolardı gün gibi arza derûnu feyz-i Rabbanî
O zât-ı âlî kadre ol kadar ikrâm ede Allah
Olalım mazhar-ı Rahmân ne kim var cümle ihvânı
Yarın rûz-i cezâda zü’l-Celâl haşreyler emvâtı
Verilir gâhî sağ soldan olur evrak bezestânı
Bugün ey mü’min-i ârif seni halk eyleyen Allah
Kitâbu’llâh’ına bir bak nedir gör emr ü fermânı
Güneş-veş âşikâr olmuş eğer nûr-i basîretden
Görürsün neyyir-i aʻzam hurûf-i ilm-i Kur’ân’ı
Doğunca mihr-i irfân burc-i dilden gösterir Hakk’ı
Gönüldür her dü-âlemde tecellîgâh-ı Sübhânî
Bütün âyât-ı Hak’dır tevhîdi tekmîl ider eşyâ
Olur şâhid eder tasdîk kimin var nûr-i irfânı
MUHAMMED LUTFÎ’ye lutfet amân ey Hâlik-ı âlem
Der-i dergâh-ı izzetde mukarreblerle kıl anı