Sözleri
Zat-ı Hakk’da mahrem-i irfân olan anlar bizi
İlm-i sırrda bahr-ı bî-pâyân olan anlar bizi
Bu fenâ gülzârına bülbül olanlar anlamaz
Vech-i Bâkî hüsnüne hayrân olan anlar bizi
Dünyâ vü ukbâyı ta’mir eylemekden geçmişiz
Her tarafdan yıkılıp virân olan anlar bizi
Biz şol abdâlız bırakdık eğnimizden şâlımız
Varlığından soyunup uryân olan anlar bizi
Kahr u lûtfu şey’-i vâhid bilmeyen çekdi azab
Ol azabdan kurtulup sultân olan anlar bizi
Zâhidâ ayık dururken anlamazsın sen bizi
Cür’a-yı sâfî içüp mestân olan anlar bizi
Ârifin her bir sözünü duymaya insân gerek
Bu cihânda sanmanız hayvân olan anlar bizi
Ey Niyâzî katremiz deryâya saldık biz bugün
Katre nice anlasın ummân olan anlar bizi
Halkı koyup lâ mekân ilinde menzil tutalı
Mısrîyâ şol cânlara cânân olan anlar bizi