Olmamak Olmaz

Uzletde vahdet, vahdetde vuslat olmamak olmaz! Hıltatda şöhret, şöhretde âfet olmamak olmaz! Esrarı çokdur nâsdan firârın eyle istihfâ, Ülfetde kesret, kesretde zahmet olmamak olmaz! Çün nev’-i insan mecbul birbirine ezâya, Sohbetde külfet, külfetde kürbet olmamak olmaz! Zâkir huzuru tenhâda bulur zikr ü fikrinden, Halvetde rikkat, rikkatde safvet olmamak olmaz! Gâfiller ile olma mecâlis gâfil olursun, Celsetde ğaybet, ğaybette nekbet olmamak olmaz! Nefsiniyken yeğ bilme ilden etme istikbâr, Izzetde zillet, zilletde hasret olmamak olmaz! Şâh-u Gedâya eyle tevazu yerme dervişi, Hormetde re’fet, re’fetde devlet olmamak olmaz! Uzletin şartı nefsini alçak ili hoş bilmek, Savletde haybet, haybetde dehşet olmamak olmaz! Aktab ü abdâl çeşm-i avamdan gizli gezerler, Ğurbetde ısmet, ısmetde kurbet olmamak olmaz! Mü’minin dünya sicnidir zinhar rahat bulamaz, Zulmetde kasvet, kasvetde illet olmamak olmaz! Etme icâbet davet-i halk-ı âhir zamâna, Davetde vefret, vefretde nefret olmamak olmaz! Eyle kanaat kût-ı mevcûde Rezzāka şükret, Hiffetde iffet, iffetde rahat olmamak olmaz! Ziynet-i nâsa bakûben etme sen dahi tuğyân, Ziynetde satvet, satvetde şakvet olmamak olmaz! Nâsa görünme hem görme nâsı bul-ğıl selâmet, Ru’yetde gaflet, gafletde haclet olmamak olmaz! Etsen nasihat düşman olûben mevtin ararlar, Himmetde hiddet, hiddetde usret olmamak olmaz! Sana kim etsin nushu kaht-ı merdân gününde, Nedretde fakat, fakatda âhet olmamak olmaz! Emval ü evlâd fitnedir bize vacib sakınmak, Nedvetde selvet, selvetde firkat olmamak olmaz! Karun’u çok mal yere batırdı, batmakta hâlâ, Ruhsatda vüs’at, vüs’atde nikmet olmamak olmaz! Hak sevidiğine çok vermez imiş mâl ü evlâdı, Kuvvetde şehvet, şehvetde levmet olmamak olmaz! Sultana kulluk bendeye farzdır olma-ğıl keslân, Hizmetde lezzet, lezzetde ferhat olmamak olmaz! Uyma hevâ-yı nefse ey zâhid iç hamr-ı aşkı, Sabvetde reybet, reybetde haybet olmamak olmaz! Kuddûsîyâ et Yezdân’a ikbal, geç mâsivâdan, Vechetde rehbet, rehbetde rif’at olmamak olmaz!