Sözleri
Âdetim budur ezelden günde bir şân olurum
Dirilip gâh cem ‘olup gâhî perîşân olurum
Bu cihânın halkına bir bir yolum uğrar benim
Cem ‘edip bunca kumâşı bir bedestân olurum
Gâh sehâb u gâh matar gâhî doluyam gâhi kar
Gâh nebât u gâhi hayvân gâhi insân olurum
Gâh nasârâ gâh yahûdî gâhî tersâ gâh mecûs
Gâhi şîa gâh olur sünnî müselmân olurum
Gâhi âbid gâhi zâhid gâhi fıska düşerim
Gâhi ârif gâhi ma’rûf gâhi irfân olurum
Gâh olur bakır kalây u gâh olur altûn gümüş
Gâh olur âlemde her ma‘denlere kân olurum
Gâh olur benden hakîr hîç kimse olmaz dünyada
Gâhi Kâf’dan Kâf’a hükm eden Süleymân olurum
Na’l ile tırnak arasında yerim gâh dar olur
Gâhi arş u kürsîden gâh âlî-meydân olurum
Gâh olur bu hırmen-i âlemde ben bir dâne yem
Geh kamuyu câmi olmuş ulu meydân olurum
Gâh olur mevcûd u ma‘dûm geh vücûd ile Âdem
Geh tecelli ile ayân u gâhi pinhân olurum
Gâhi dünyâ gâhi ukbâ gâhi mahşer gâhi sırât
Gâhi berzah gâhi cennet gâhi nîrân olurum
Gâhi mâlik gâhi âteş gâhi zakkum gâhi cahîm
Gâhi hûr u gâhi gılmân gâhi rıdvân olurum
Gâhi zerre gâhi güneş gâhi kamer gâhi nücûm
Gâhi arz u gâhi semâ gâhİ arş-ı Rahmân olurum
Bunca suretler libâsın gâhi bir bir giyerim
Gâh soyunup cümlesinden şöyle üryân olurum
Şimdi kesretde olan adım Niyâzî söylenir
Âlem-i vahdet içinde sırr-ı Yezdân olurum