Sözleri
Dil yanar mı görmese germiyyet-i cânâneyi
Şem’a bak kim yanmayınca yakmadı pervâneyi
Yakdun ümmîd-i fitilüm eyledün âhir hevâ
Yandurursun ba’d-ez-în bilmem aceb cânâneyi
Çâk çâk itdüm hicâb-ı vasl-ı yâri şevk ile
Kalmadı pâkim cihânda nideyim pervâneyi
Kays-ı dil yâ Leylî der her şeb yaturmaz âlemi
Âkıbet zencîr-i aşka çekdiler dîvâneyi
Ben de bir tekme yedüm esb-i felekden aşk ola
Sâki-i firkatden içdüm âteşîn peymâneyi
Hırka-i nîlûferün elbette gerdün çâk ider
Leb-küşâ olsam işitse nara-i mestâneyi
İnfiâlün yârdan yoksa aceb ağyârdan
Hâme-âsâ mesken itdün ey gönül vîrâneyi
Âşinâyam tâze mazmûna belâğât-mûnisem
Söylemem lafz-ı garîb ü manî-i bigâneyi
Ehl-i derde söyle hâlün söyler isen Kâmi’yâ
Hâb-ı pîş-âlüdegâna söyleme efsâneyi