Sözleri
Dildâra müştâk oldı cân anun cemâlin arzular
Hicrâna katlanmaz gönül yârun visâlin arzular
Yandurdı şevkun bağrumı gör tâbişindin kim neçe
Cânum susamışdur lebün âb-ı zülâlin arzular
Yakmağ gereksen yaş ile her dem gözün misbâhını
Ger gözlerün gerçekleyin anun hayâlin arzular
Çarhun hilâl ü bedrine gönlüm dilemez bakmağa
Niçün ki yüzün bedrini kaşun hilâlin arzular
Yâ Rab ne hûrî-çehredür şol mâh-ı tâbân yüzlü kim
Gördükçe anun yüzini güneş zevâlin arzular
‘Aşıklarun âzârına gör kim neçe bel bağlamış
Şol bî-vefâ ‘aşıklarun niçün vebâlin arzular
Şehdün hadîsi hem şeker hoş gelmez ol müştâka kim
Şol Rûh-ı Kudsün mantıkı şîrîn makâlin arzular
Çîn nâfesinden bezdi cân ‘anberden usandı gönül
Her subh-dem şol dil-berün zülfiyle hâlin arzular
Âşkunda kurbân olduğum ister Nesîmî sor neden
Şol ma‘nîden kim dünyada her şey kemâlin arzular